YouTube convértese na maior empresa de medios do mundo tras superar a Disney

YouTube consolidou en 2025 unha posición histórica dentro da industria do entretemento ao converterse na maior empresa de medios do mundo por volume de negocio. Así o conclúe a firma de análise financeira MoffettNathanson, que estima que a plataforma de vídeo propiedade de Google superou os ingresos do negocio mediático de The Walt Disney Company durante o pasado exercicio.
Segundo os datos feitos públicos por Alphabet, matriz de Google, YouTube rexistrou máis de 60.000 millóns de dólares de facturación en 2025. A estimación de MoffettNathanson sitúa a cifra arredor dos 62.000 millóns de dólares, o que permitiría á plataforma superar os 60.900 millóns de dólares obtidos pola división de medios de Disney (sen incluír a área de experiencias e parques temáticos).
Este avance confirma unha tendencia que os analistas xa apuntaban hai tempo. A mesma firma cualificara o ano pasado a plataforma como o «novo rei de todos os medios». A súa valoración actual sitúase entre os 500.000 e os 560.000 millóns de dólares, unha cifra moi superior á dos competidores tradicionais do sector. O rival máis próximo sería Netflix, cunha capitalización bursátil que rolda os 409.000 millóns de dólares.

Un modelo baseado en publicidade e subscricións

O negocio publicitario segue sendo unha das principais fontes de ingresos da plataforma. Só no cuarto trimestre de 2025 YouTube ingresou 11.400 millóns de dólares en publicidade, elevando o total anual por riba dos 40.000 millóns, o que supón máis do que facturan por tal concepto Disney, NBC, Paramount e Warner Bros. Discovery xuntas.
Porén, a compañía tamén consolidou un amplo ecosistema de servizos de subscrición. Entre eles atópanse YouTube Premium, YouTube Music, o paquete deportivo NFL Sunday Ticket e o servizo de televisión en liña YouTube TV, que ofrece canles en directo a través da Internet.

A economía dos creadores e a IA como eixes de crecemento

Un dos elementos centrais do éxito da plataforma é o seu ecosistema de creación de contido. Desde o seu lanzamento, YouTube pagou máis de 100.000 millóns de dólares a creadores, compañías musicais e socios mediáticos, converténdose nun actor fundamental dentro da industria do entretemento dixital.
Os analistas de MoffettNathanson consideran que o crecemento da plataforma continuará nos vindeiros anos grazas á súa escala como distribuidor de contido e aos investimentos en ferramentas baseadas en intelixencia artificial.
Estas tecnoloxías permitirán aos creadores producir contidos con maior rapidez e reducir custos en ámbitos como o deseño de escenarios, efectos visuais, vestiario ou maquillaxe, procesos que tradicionalmente requirían investimentos elevados.