Código Cero - Diario Tecnolóxico de Galicia

Pont-Up Store volve a Pontevedra en setembro con 41 startups

Pedro Pérez — 2021-07-30T16:45:35Z

A feira Pont-Up Store, referente no panorama estatal dos eventos de innovación e emprendemento, volve á súa actividade logo de adiar a súa VII edición o ano pasado por mor da COVID-19. A celebración terá lugar novamente na praza de España de Pontevedra durante os días 24 e 25 de setembro.
A organización realizou un proceso de selección que finalmente terá 41 starups galegas, 36 serán empresas con presenza de seu (stand), e outras 5 que só desenvolverán actividades demostrativas na carpa. Como novidade, atópase un grupo de emprendementos que decidiron lanzarse ao mercado en datas recentes, a pesares de todos os atrancos impostos pola pandemia. O Pont-Up Store decidiu premiar esta valente acción abrindo nesta edición unha convocatoria extraordinaria especialmente dirixida a persoas emprendedoras que puxeron en marcha a súa empresa en plena COVID-19.
A convocatoria extraordinaria foi un éxito, con máis de 5 candidaturas por cada praza dispoñíbel, entre elas varias radicadas en Pontevedra, destacando a innovación tecnolóxica aplicada co obxectivo de resolver problemas de espazo e mobilidade nas cidades. É o caso de EVOURBE, que vai presentar un sistema intelixente de xestión de aparcamento, e por outra parte VI&GO, que lanza un proxecto de mobilidade sustentábel mediante subscrición. Empresas do sector da alimentación, con espazos web para a compra dos seus produtos, e empresas do ámbito cultural, que ofrecen alternativas á difícil situación do sector, completan a convocatoria.
En canto aos emprendementos que xa foran seleccionados para participar na edición de 2020, atopamos unha participación multisectorial con moita diversidade cun denominador común, a innovación e creatividade. Gastronomía, moda, complementos, arte, sustentabilidade, rural galego e innovación tecnolóxica son os principais sectores que se inclúen nesta VII edición. Demostracións, podcast en directo, cursos de produción e stand son as algunhas das ferramentas que utilizarán as diferentes empresas para presentar seus traballos.
O director do encontro, Pedro Figueroa, avanzou que entre as principais novidades que trae consigo este ano o Pont-Up Store “figura un novo proxecto denominado dixital_pontup, ao que o Concello de Pontevedra destinou unha achega de 6.000 euros, que se está a desenvolver e que se presentará nas propias datas do Pont-Up”. Segundo afirma o director, “a plataforma permitirá que as acción innovadoras poidan ser visitadas en calquera lugar e momento. Ademais contará cunha programación propia durante todo o ano para a realización de foros, recreacións dixitais en 3D e stands virtuais e interactivos”

Dispoñíbel no Portal da Lingua o primeiro dicionario galego-ruso

Pedro Pérez — 2021-07-29T19:14:41Z

O secretario xeral de Política Lingüística, Valentín García, achegou este 29 de xullo os detalles do que sería o primeiro Dicionario galego-ruso. Fíxoo nunha rolda de prensa na que participou o responsábel do traballo, Aleksandr Dziuba, profesor e auxiliar de conversa na Escola Oficial de Idiomas da Coruña. Trátase dun volume dixital que xunta case 11.000 lemas organizados por orde alfabética e que será obxecto de actualizacións periódicas até chegar ás 40.000 entradas.
Amais, nas edicións posteriores planéase incluír un apéndice gramatical que conteña toda a información necesaria para saber as regras básicas da lingua galega.
O novo dicionario está accesíbel de balde desde o Portal da Lingua Galega.
O Dicionario galego-ruso pretende ser a primeira tentativa dun gran dicionario entre estes dous idiomas que inclúa tanto o léxico normativo, recoñecido pola RAG, coma palabras e máis expresións que actualmente se atopan fóra da norma estándar. Un dos obxectivos principais é crear unha ponte directa entre as culturas galega e rusa, que permita facilitar o proceso de aprendizaxe de ambas as dúas linguas e o traballo de tradución de diferentes textos.
O autor, Aleksandr Dziuba, agarda que a publicación axude a aumentar a cantidade de traducións das obras literarios galegas ao ruso, “xa que a fermosa literatura multisecular galega merece moita máis sona no mundo non galegofalante, e ademais que provoque unha nova vaga de interese na cultura e lingua rusas entre os galegos e galegas e viceversa”

En marcha Galicia Olímpica, a web para seguir aos deportistas galegos en Toquio

Pedro Pérez — 2021-07-27T18:54:08Z

A Xunta vén de poñer en marcha a nova web Galicia Olímpica que recolle toda a información sobre os 21 deportistas olímpicos e 14 paralímpicos galegos que participan nestas datas na celebración dos Xogos Olímpicos e Paralímpicos de Toquio.
A nova páxina web nace da colaboración entre a Consellería de Emprego e Igualdade e a Secretaría Xeral para o Deporte que ademais, axudan aos deportistas coas Axudas Reto Galicia Toquio con Igualdade 2021 que achegan aos competidores un total de 300.000 euros. Deste xeito os deportistas galegos levan a Toquio a campaña NON contra a violencia de xénero.
O espazo web recolle, ademais do calendario dos deportistas galegos con todos os detalles das probas nas que compiten, a información ao momento sobre os seus resultados. Tamén contén extensas entrevistas personalizadas para coñecer máis a fondo aos deportistas que compiten de Galicia. “A alegría do esforzo do olimpismo é a que sentes todos os integrantes da delegación galega que nos representa en Toquio”, destacou o secretario xeral.

O CPEIG e AMTEGA organizan un debate sobre a optimización dos Fondos Next Generation

Pedro Pérez — 2021-07-20T17:32:15Z


Miguel Ángel Domínguez, presidente de Alastria

O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA) organizan este venres, 23 de xullo, un espazo de networking e debate chamado tres14.pm. Celebrarase de maneira presencial, para un grupo máximo de quince profesionais do sector das TIC ou outras persoas interesadas na materia, no Centro GaiásTech situado na Cidade da Cultura en Santiago. O tema a tratar será a optimización dos beneficios dos Fondos Next Generation.
O programa, que se poderá seguir en streaming, conta con espazos de networking, de debate, opinión e coñecemento, invitando a expertos en distintas materias para que realicen unha exposición seguindo un programa específico no que reflectirán, en catorce minutos, tres principios sobre dita temática de cara a establecer un coloquio posterior cos participantes. O relator desta primeira xornada do venres será Miguel Ángel Domínguez, presidente de Alastria, e impartirá unha conferencia titulada Innovación, robotización e BlockChain para optimizar os beneficios dos fondos Next Generation.
O experto sinala que “a innovación é fundamental se desexamos, tal e como se esixirá cos 140.000 millóns de euros dos Fondos Next Generation, transformar a estrutura económica do país, para lograr que sexa máis verde e mais dixital”. En relación á robotización, salienta que “ser eficiente é imprescindíbel para poder xestionar co mesmo persoal dez veces máis expedientes, máis licitacións e máis subvencións que os dun exercicio normal”.
Este programa forma parte dunha ampla axenda que a AMTEGA está a promover dende o centro GaiasTech, onde a tecnoloxía se converte no vector do cambio das organización que poden ser respostas innovadoras cun alto valor engadido ás demandas da sociedade.

A Deputación da Coruña e COGAMI loitarán contra o agravamento da fenda dixital entre os colectivos en risco

Pedro Pérez — 2021-07-19T15:00:00Z

O presidente da Deputación da Coruña, Valentín González Formoso, e o presidente de COGAMI, o sonense Anxo Queiruga, anunciaron unha nova colaboración entre ambas as dúas entidades. Deste xeito reforzan a súa aposta polo programa de inserción laboral, que o ano pasado facilitou emprego a 1.705 persoas con discapacidade en Galicia, 714 delas na provincia da Coruña.
Anxo Queiruga, agradeceu o apoio da Deputación para o desenvolvemento deste servizo que conta con 18.561 persoas inscritas, 8.064 delas da Coruña. Neste sentido, a Deputación continúa a reforzar o seu apoio ao programa a través dunha achega que incrementou no pasado mandato, pasando dos 60.000 aos 90.000 euros anuais. “Trátase dunha axuda fundamental para un colectivo con especiais dificultades para acceder ao mercado laboral”, apuntou o presidente da Deputación da Coruña, engadindo que un dos obxectivos é poñer o foco nas novas tecnoloxías, tanto para mellorar a súa formación como para incrementar a súa empregabilidade.
Doutra banda, Anxo Queiruga aproveitou para lembrar que “as dificultades na inserción laboral das persoas con discapacidade estanse a agravar polas consecuencias sociais e económicas derivadas da pandemia”. Neste sentido, a iniciativa promove a inclusión laboral das persoas con discapacidade, que contan cunha taxa de paro que é de 10 puntos superior e, trala COVID-19, viron como como se agravaba a problemática da fenda dixital, xa que se incrementou a necesidade de estar (e traballar) en liña sen que este proceso viñera parello de grandes iniciativas que garantisen que o dito proceso fose global e non deixara a ninguén fóra.

Vodafone e DATAlife asócianse para impulsar a Galicia como rexión Next Generation en Europa

Pedro Pérez — 2021-07-13T19:14:17Z

Vodafone de vén de alcanzar recentemente un acordou de colaboración co Hub de Innovación Digital galego DATAlife. A operadora líder europea convértese así na primeira compañía do sector de telecomunicacións en unirse a esta iniciativa, que busca converter a Galicia nunha rexión Next Generation en Europa.
Neste marco, Vodafone apoia o proxecto NextGenRegion, unha iniciativa liderada por DATAlife que conta coa participación de máis de 50 empresas e entidades de toda España. O proxecto busca xerar un efecto tractor sobre o sistema produtivo, o medio ambiente, o turismo sostible e a saúde, preténdese, por tanto, favorecer a diversificación económica e empresarial de cara a actividades tecnolóxicas máis avanzadas.
Deste xeito, Vodafone aportará todo seu coñecemento en Big Data, Intelixencia Artificial, Internet das Cousas (IoT) e ciberseguridade para acelerar a transformación dixital das empresas en Galicia, facilitando o despegue e uso destas novas tecnoloxías. Así, a operadora axudará a incrementar a competitividade das empresas da nosa terra, falecendo o ecosistema dixital galego.
“O proxecto de DATAlife encaixa perfectamente co traballo que vimos desempeñando en Vodafone para acelerar a transformación dixital dos sectores que son estratéxicos para nosa economía”, remarca Francisco Vallejo, director de Vodafone en Galicia. Con este, Vodafone presentou xa proxecto e iniciativas para fondos europeos por valor aproximado de 900 millóns de euros, co que pretende combater a fenda dixital rural e impulsar a competitividade industrial.

O teletraballo medra en Galicia: o 20% das persoas ocupadas desfrutan desta opción

Pedro Pérez — 2021-07-12T16:30:00Z

Coa irrupción da pandemia pola COVID-19, a opción do teletraballo medrou en Galicia. Segundo o novo informe sobre sociedade dixital en España relativo ao período 2020-2021 elaborado pola Fundación Telefónica, un 20,5% das persoas ocupadas da comunidade poden traballar desde a casa. O confinamento fixo que moitos empresarios comezaran a considerar un modelo semipresencial para seus negocios que tamén lles axude a manter e atraer talento.
O informe sinala tamén que o 61% das pemes españolas facilitará o teletraballo aos seus empregados nos vindeiros seis meses. “O teletraballo deixou de ser unha costume residual para converterse en poucos meses nunha necesidade en moitas organización, cuxa continuidade de negocio foi posíbel grazas a que os empregados puideron seguir traballando desde seus domicilios”, destacou Belén Espejo, experta en dixitalización do posto de traballo en Telefónica Empresas.
Neste contexto, Telefónica vén de crear un Libro Blanco de Teletraballo que se divide nas seguintes sección: introdución e contexto, modelos de traballo a distancia, novo entorno tecnolóxico do empregado, recomendacións para o espello de traballo, xestión do cambio e glosario de términos. Deste xeito, o libro trata de explicar o contexto legal actual, crear novos espazos de traballo e describir os pasos que hai que seguir para facer o cambio de cultura e incorporar novas capacidades dixitais ao traballador.

A Xunta promove a presenza de mulleres nas empresas tecnolóxicas

Pedro Pérez — 2021-07-12T15:45:10Z

A Xunta de Galicia, a través da Axencia para a Modernización Tecnolóxica de Galicia (AMTEGA) e en colaboración cos colexios profesionais, está a intensificar as acción encamiñadas a fomentar as vocacións tecnolóxicas entre as mulleres para acelerar a redución da fenda de xénero.
Así, os programas Mática, Girl SteAm e Faladoiros en Mancomún teñen como obxectivo difundir información entre nenas e mozas e presentar experiencias de éxito de mulleres no sector TIC. Por un lado o campamento tecnolóxico Mática desenvólvese de xeito presencial nos campus universitarios da Coruña e Ourense e no Campus Vida de Santiago de Compostela. Ademais existe a posibilidade de formato online en caso de non poder asistir presencialmente.
Doutra banda, o programa Girl SteAm ten como obxectivo o impulso de actividades de difusión de experiencias dirixidas a nenas para espertar seu interese nos estudos STEAM (Ciencia, Tecnoloxía, Enxeñaría, Artes e Matemáticas). Girl SteAm desenvólvese a través de obradoiros formativos dirixidos a nenas de entre 8 e 11 anos, e entre 12 e 15 anos.
A Amtega tamén promove os Faladoiros en Mancomún que consisten en conversas en formato vídeo nas que tanto as condutoras como as participantes son mulleres relacionadas co mundo tecnolóxico, e especialmente as que están en contacto co software libre e a cultura libre.
Todas estas acción teñen como obxectivo a eliminación da fenda de xénero que aínda se mantén en profesións relacionadas coas tecnoloxías. Neste sentido, un informe elaborado polo Observatorio da Sociedade da Información e a Modernización de Galicia (OSIMGA) sinala que soamente o 14,3% das empresas tecnolóxicas contan con mulleres en postos de dirección. Ademais, unas 8.000 mulleres ocuparon postos de traballo en empresas do sector tecnolóxico galego en 2020, o que representa o 32,6%.

A Deputación da Coruña entrega os premios PEL ás empresas de meirande empuxe innovador

Pedro Pérez — 2021-07-08T20:24:53Z

A Deputación da Coruña celebrou esta tarde en Oleiros o acto de entrega da IV edición dos premios PEL, uns galardóns cos que a institución provincial recoñece cada ano o talento e a innovación das empresas da provincia. “O traballo destas empresas contribúe á reactivación económica que tanto necesitamos tras a pandemia, crean emprego e permite que A Coruña siga a ser o motor económico de Galicia”, afirmou o presidente da Deputación, Valentín González Formoso.
O acto repartiu un total de 75.000 euros en premios, 15.000 euros para cada gañador. A empresa Albari S.L. recibiu o premio na categoría de mellor iniciativa empresarial nova, polo seu orixinal modelo de negocio que combina a actividade educativa e divulgativa en materia de astronomía, coa posibilidade de vivir a experiencia inmersiva en plena natureza poñendo en valor os recursos turísticos que a astronomía ofrece.
Pola súa banda, Galchimia foi galardoada na categoría de mellor iniciativa empresarial consolidada, por ser un referente internacional en química orgánica. Como novidade, nesta cuarta edición creouse unha nova categoría, a de mellor iniciativa innovadora na loita contra a COVID-19, na que resultou gañadora a startup tecnolóxica coruñesa BionisSupplychain Technologies por crear nun tempo récord e en plena pandemia un respirador artificial de baixo custe facilmente industrializábel, o respirador Freesterra.
Asemade, na categoría destinada ao concello promotor do emprego de calidade o galardón foi para o Concello de Brión, polas medidas implantadas a favor do fomento da iniciativa empresarial e o emprendemento, como a posta en marcha da cooperativa de transformación de produtos do agro DaquíDarredor.
En canto á categoría destinada a premiar ás mellores asociacións empresariais da provincia, o Clúster Tecnolóxico Empresarial das Ciencias da Vida (BIOGA) resultou galardoado pola súa contribución á mellora no posicionamento do sector biotecnolóxico galego. Ademais, houbo un recoñecemento á xornalista de El País, Sonia Vizoso, como a mellor comunicadora en materia de Emprego, Industria e Economía. “Hoxe premiamos ás empresas, pero sobre todo premiamos o talento e o esforzo das persoas que hai detrás”, afirmou o presidente para poñer punto e final á cuarta edición da entrega de premios PEL.

21 días co galego e + fixo ferver as redes coa súa innovadora proposta de dinamización lingüística

Pedro Pérez — 2021-07-08T10:42:15Z


O secretario xeral de Política Lingüística, Valentín García

O programa de promoción do uso do galego 21 días co galego e +, cuxa orixe cómpre situala no IES da Pobra do Caramiñal (coa primeira versión da experiencia, 21 días co galego, impulsada pola profesora Pilar Ponte), contou coa participación de máis de 9.000 alumnos de 24 centros educativos desde a súa posta en marcha. Tamén tivo unha forte presenza dixital nas redes sociais e a través da web de seu (un blog permanentemente actualizado con mancheas de entradas).
Segundo fixo saber Valentín García, responsábel da Secretaría Xeral de Política Lingüística (encargada de estender a iniciativa alén do IES da Pobra), durante os anos que leva en marcha, o número de centros e alumnos foi medrando en cada unha das edicións, pasando dos 1.400 participantes no curso 2018-2019 aos preto de 4.000 no curso pasado.
“Os datos demostran que se está a consolidar como unha útil ferramenta para fomentar o emprego da lingua na mocidade participante e nos seus espazos de socialización”, expresou Valentín García, engadindo que este impacto estase a notar tamén nos espazos dixitais onde a iniciativa está presente a través dun blog, así como unha canle propia en YouTube e perfís en Facebook, Twitter, Instagram e TikTok onde se está a constatar “un aumento da fluidez na comunicación coloquial en lingua galega de todos os colectivos participantes”.
Neste sentido, 21 días co galego e + está a achegar bos resultados en canto ás competencias dos alumnos observándose un maior coñecemento da realidade lingüística e unha posta en valor dos dialectais propios así como un fortalecemento de nexos de unión coa comunidade educativa. Así, Valentín García recordou que entre as prioridades do Goberno autonómico está “seguir traballando en conseguir a transmisión e emprego da lingua nas familias e na mocidade, co fin de facela presente en eidos como Internet, os videoxogos e as zonas urbanas”.
Por outra banda, o secretario xeral de Política Lingüística defendeu o procedemento do CELGA, onde o número de matriculados superou os 1.500, o máis numeroso nos últimos anos. Por último, tamén se avanzou que o Goberno galego ten previsto levar a cabo este verán obras no CIP de Bembibre de Val do Dubra cun investimento de máis de 392.000 euros que suporá adaptar esta infraestrutura ás novas esixencias construtivas establecidas no Plan de Nova Arquitectura pedagóxica de Galicia, dotado con máis de 191 millóns de euros.
Dende A Pobra


No centro da imaxe, Valentín García e a profesora Pilar Ponte

A actividade 21 días co galego foi posta en marcha hai anos no IES da Pobra pola profesora Pilar Ponte, que foi quen de mobilizar a unha chea de rapazas e rapaces para que se lanzasen a falar a nosa lingua, sen interrupción, durante o número de xornadas que se estipula no nome do proxecto. Tal e foi a repercusión da proposta que a Consellería de Cultura e Educación, a través da Secretaría Xeral de Política Lingüística, decidiu levala máis aló do local e estendela a todo o ámbito galego. Tal e como se prevía, o chimpo autonómico de 21 días co galego (chamado agora 21 días co galego e +) saldouse cun notábel éxito nas súas tres primeiras edicións.