Código Cero - Diario Tecnolóxico de Galicia

Cruz Vermella e o Centro Comercial Gran Vía botan man de CreAppcuentos

Raquel Noya — 2014-10-17T13:22:00Z

A aplicación galega CreaAppcuentos, creada en 2003 polos nosos emprendedores Avelino Correa e Antonio Escudero, está a estender as súas pólas e raíces en múltiples escenarios. De feito, hai pouco falamos dunhas previsións de crecemento para 2014 que moi poucas firmas desenvolvedoras son quen de manexar: a idea este ano é chegar ás 100.000 descargas. Esta semana tivemos novidades sobre a proxección desta ferramenta, mergullada en pleno espallamento cara ao sector corporativo (logo de romper os límites do ámbito das aplicacións infantís). A idea é “facilitar a consecución de obxectivos de distintas entidades”. A estratexia de medre está a dar resultado. De feito, Cruz Vermella e o centro comercial Gran Vía de Vigo confiaron xa na aplicación para transmitir comunicación de seu.
Segundo nos contan os creadores de CreaAppcuentos, o chimpo ao mundo das empresas, as ONG e os centros comerciais ou culturais estase a facer empregando o mesmo motor de uso da propia aplicación para adaptala ás novas necesidades e esixencias. A idea é posibilitar que as entidades que aposten pola ferramenta poidan transmitir aos seus clientes, usuarios ou visitantes as súas mensaxes e “cumprir obxectivos dun xeito diferente ao habitual, máis ameno e divertido”, engaden os desenvolvedores da aplicación.
Un exemplo diso é a actividade que recentemente levouse a cabo co centro comercial Gran Vía de Vigo, na que se adaptaron fondos, obxectos e personaxes do centro para a realización dun obradoiro educativo. A adaptación foi desenvolvida por Víctor Ribas, habitual na creación dos deseños de CreAppcuentos. Cruz Vermella tamén contou coa iniciativa de Avelino Correa para a realización dunha campaña de sensibilización destinada a previr accidentes.
“No marco empresarial”, explica Correa, “as compañías públicas ou privadas, museos ou fundacións poden recorrer a CreAppcuentos para realizar demostracións de produto ou servizos, para transmitir mensaxes concretas, por exemplo, a importancia da reciclaxe, hábitos de consumo ou o correcto uso das redes sociais entre os máis novos, entre outros”. E engade: “A través da personalización de fondos, escenarios, obxectos e personaxes, podemos dispor dunha ferramenta en calquera sector”. Esta liña de acción continuará convivindo coa orixinaria de CreAppcuentos, que é a de “crear contos ou historias de maneira sinxela e intuitiva converténdonos en poucos pasos nos propios autores das aventuras”.

O I Congreso hispano-luso de software libre contará con destacados relatores galegos

Raquel Noya — 2012-09-21T14:40:00Z

Os vindeiros días 28 e 29 de setembro, os seareiros das ferramentas baseadas en código aberto teñen unha cita imprescindible en Mérida, onde se vai celebrar o I Congreso hispano-luso de software libre, que reunirá aos máis importantes profesionais deste eido da Península Ibérica. Serán dúas xornadas nas que se van desenvolver toda unha serie de actividades relacionadas co software libre: conferencias, obradoiros-charlas, relatorios, sesións B2B... co obxectivo de poñer en común iniciativas e proxectos entre empresas españolas e portuguesas.
O obxectivo do congreso é facilitar o contacto profesional e de colaboración entre a comunidade de usuarios de software libre de España e Portugal, internautas que ata agora só se coñecían de xeito virtual ao ter interactuado en foros e redes sociais.
A maiores, a cita servirá para que as persoas emprendedoras poidan coñecer de primeira man as vantaxes que ofrece esta tecnoloxía, e utilizar as súas ferramentas para mellorar os seus negocios.
É nesta faceta do congreso onde entra en xogo a tecnoloxía galega, pois a organización convidou a participar á galega Sdweb (Solucións Dixitais S.L.), como representante de tódalas empresas de Galicia especializadas no desenvolvemento de aplicacións en código aberto.
Xa que logo, os profesionais de Sdweb, con sede en Santiago de Compostela, impartirán 4 obradoiros, centrados en distintas ferramentas que facilitan o traballo interno a nivel empresarial.
Falamos do obradoiro de Alfresco (Workflow BPM), que impartirá Diego Meixeiro; do obradoiro para presentar o caso de éxito do xestor de contidos Drupal, da man de Iván Vázquez; do obradoiro Business Inteligence: solucións corporativas de reporting con Jaspersoft BI Suite, no que Antonio Carro abordará a implantación de solucións de Datawarehouse baseadas en código aberto; e do obradoiro de Moodle, mediante o cal se tratarán de difundir as vantaxes económicas e competitivas que se obteñen ao implantar nunha organización este modelo de e-learning. Segundo informan os seus responsables, “este constitúe, sen dúbida, un marco de referencia para impulsar a colaboración interrexional no ámbito tecnolóxico”, ao que engaden que as empresas, institucións e individuos “atoparán un lugar para o intercambio de coñecemento e experiencias”, “sendo ademais o lugar ideal para aqueles que procuran casos concretos de éxito en aplicación de software libre, e foros de discusión creados especialmente para eles”, afirman.

Pechado o prazo para acceder ao premio Gradiant á mellor tese doutoral aplicada ás TIC

Raquel Noya — 2012-09-21T12:45:00Z

O Centro Tecnolóxico de Telecomunicacións de Galicia, Gradiant, vén de pechar o prazo de presentación de propostas para participar no seu Premio á Mellor Tese Doutoral aplicada ao sector TIC 2012, que convoca en colaboración coa Asociación de Enxeñeiros de Telecomunicación de Galicia.
O galardón ao mellor traballo será entregado o vindeiro venres, 26 de outubro, no transcurso da XVII Noite Galega das Telecomunicacións e da Sociedade da Información, que se celebrará na Illa da Toxa.
Con este premio, dotado con 2.000 euros en metálico, Gradiant pretende fomentar a realización de teses doutorais “como vehículo de xeración de coñecemento”, apuntan, e recoñecer a aquelas persoas dedicadas á investigación que teñan completada a súa tese doutoral nalgunha das tres universidades galegas, nun eido aplicable ao sector TIC.

O CiTIUS procura novas tecnoloxías que faciliten o tratamento de información no ámbito hospitalario

Raquel Noya — 2012-09-21T12:03:57Z

O Centro Singular de Investigación en Tecnoloxías da Información (CiTIUS) celebrou, o pasado día 20, unha conferencia sobre as tecnoloxías de busca e clasificación de datos de ámbito médico, a fin de facilitarlle esta tarefa aos profesionais galegos.
O acto, que ía dirixido principalmente a profesionais e investigadores do eido da sanidade, tivo lugar no Hospital Clínico Universitario de Compostela, e contou coa participación de David Losada, profesor titular de universidade na Área de Ciencias da Computación e Intelixencia Artificial da USC, que dedica o seu labor investigador a facilitar a recuperación de información en aspectos como a construción automática de resumos, detección de novidades, clasificación de textos e minaría de opinións...
No seu relatorio, que levaba por titulo Tecnoloxías de procura e clasificación para o ámbito médico, Losada abordou as posibilidades que a informática brinda ás tarefas de xestión, procura e clasificación de documentos e expedientes no eido hospitalario. A recuperación de información e a aprendizaxe automática, dixo, “poden achegar solucións para crear software que lle axude ao persoal sanitario a procesar e localizar os datos necesarios para a súa actividade, tanto a nivel de investigación como no exercicio clínico diario”.
Estas técnicas” son de especial relevancia”, apuntou, “pois supoñen potencialmente unha valiosa contribución ao traballo dos profesionais da medicina”, engadiu.
Na actualidade, segundo apuntan dende o CiTIUS, o gran volume de documentos que xestionan os hospitais fai moi dificultosa a súa localización e acceso, “polo que son necesarias novas técnicas e ferramentas que acheguen resultados de xeito máis rápido e efectivo”, adiantaron.

Galicia intercambia experiencias con outros países sobre a aplicación das TIC ao sector turístico

Raquel Noya — 2012-09-21T11:41:00Z

Os responsables do proxecto internacional I-Speed, unha iniciativa europea posta en marcha para buscar medidas de desenvolvemento sostible que se apoien nas TIC, escolleron o Hostal dos Reis Católicos para celebrar alí a súa conferencia final, un acto co que pechaban o traballo levado a cabo conxuntamente nos últimos meses.
Neste escenario, no que se funden tradición e innovación de xeito sublime, os dez socios procedentes de nove países europeos, entre os que se atopa Galicia, propuxeron medidas e ferramentas coas que fomentar a competitividae e sostibilidade da economía do Turismo, a partir, sobre todo, do uso das TIC.
Os dez socios do proxecto deron a coñecer durante a conferencia as tres actuacións que xurdiron do traballo realizado de maneira conxunta, que consisten, basicamente, nunha guía de boas prácticas, nun informe de transferibilidade e máis nun informe de recomendacións políticas, que xa están dispoñibles na web oficial do proxecto.
O encontro foi organizado pola Secretaría Xeral para o Turismo, o organismo que representa ao noso país no proxecto, que lle aportou ao proxecto a súa experiencia na creación e posta en funcionamento da Central de Reservas en liña de Turismo Rural de Galicia a través de Turgalicia.
Durante a súa intervención, José Paz destacou tamén a posta en marcha da ferramenta Comparte Galicia, que a Xunta transferiu da experiencia Only Warsaw do socio polaco do proxecto.
En relación con isto, o Goberno estuda a posibilidade de implantar na súa web turística unha plataforma de descarga e visualización de vídeos, para que sexan os propios turistas os que aporten a súa visión do territorio, ofrecendo así un “plus de confianza para o visitante”, apuntou Paz.
Powys Connected é outra das experiencias tecnolóxicas citadas na conferencia que están a ser estudadas por Galicia, porque se basea na análise das necesidades tecnolóxicas das PEME e ofrece unha liña de axudas para a implantación de tecnoloxías, e unha web específica para a comunicación directa coa administración turística nesta materia.
O Director Xeral de Relacións Institucionais e Parlamentarias, Gonzalo José Ordóñez Puime, que tamén participou neste acto de clausura, resaltou a aposta Xunta polas TIC para dar a coñecer o destino Galicia. Así, recalcou que “Turgalicia ten sido a primeira institución turística de España en contar cun Contact Center Social Media, pasando de prestar un servizo reactivo a prestar un servizo proactivo aos potenciais viaxeiros”, engadiu.
Tamén resaltou a posta en funcionamento no xeodestino Ribeira Sacra de 21 oficinas virtuais de turismo; o Libro de Pedra; as redes sociais corporativas de Turismo de Galicia; a aplicación para smartphones de sendeirismo ou enoturismo ou a web de sinaléptica, entre outras cousas; así como a participación do noso gabinete responsable de turismo en seminarios Webinar e en encontros e feiras virtuais como a Conexión Spain Virtual de Canadá.
Neste proxecto tecnolóxico, que botou a andar en 2010, ademais de Galicia participan outros socios de Italia, Noruega, Polonia, Bulgaria, Creta, Gran Bretaña, Romanía e Francia.

Unha funeraria madrileña ofrece inserir códigos QR nas lápidas

Raquel Noya — 2012-09-20T12:22:55Z

Memorial Spain, unha compañía de venda en liña de artigos e servizos funerarios, vén de atopar nas novas tecnoloxías un valor engadido para diferenciarse aínda máis da competencia: empregando os códigos QR para realizar memoriais únicos.
Entre as lápidas e sepulturas, xardineiras, servizos de limpeza e mantemento, esculturas de cerámica, nichos especiais e urnas para cinzas... a firma oferta agora un servizo de códigos QR incrustados nas lápidas, que permiten recordar de forma ben distinta (e tamén orixinal todo hai que dicilo) aos defuntos.
Estes códigos bidimensionais teñen a capacidade de redireccionar ás persoas que visiten as lápidas (cos seus smartphones en man) a todo tipo de contidos multimedia, ben sexan imaxes, vídeos ou música persoal que a familia considere axeitada para lembrar ao defunto.
Segundo informa a compañía na súa web, o código QR imprímese nunha peza de cerámica e colócase na lápida, de xeito que resulta moito máis doado e orixinal “personalizar o recordo dun ser querido”, aseguran.
A empresa tamén se encarga de editar o material audiovisual que achegue a familia, e de crear o código QR, para que, unha vez incrustado na lápida, permita o seu acceso dende os lectores dos móbiles de última xeración.

Microsoft ofrece unha solución provisional ao seu fallo de seguridade

Raquel Noya — 2012-09-20T12:21:09Z

Logo de que Microsoft advertira dun bug (erro) descuberto no seu navegador Internet Explorer, que facía que os ordenadores foran vulnerables aos ataques de hackers, a compañía vén de activar unha actualización que “resolve a grave greta de seguridade detectada”, afirman.
Microsoft ofrece, asemade, unha solución provisional para impedir calquera risco na seguridade dos equipos que usan o Explorer, malia que segundo afirman, “ata agora só uns poucos usuarios foron vítimas de ataques”.
O fallo de seguridade, que permitía que os equipos fosen infectados por un troiano, foi detectado durante a pasada fin de semana, e a madrugada do luns, a Oficina Alemá de Seguridade Informática (BSI) recomendoulle aos usuarios empregar navegadores alternativos ao Explorer.
O problema afectoulle a computadores que empregan Internet Explorar nas versións 7 e 8 con sistema operativo Windows XP, así como as versións 8 e 9 con Windows 7. O novo Explorer 10, que se presentará a finais de outubro con Windows 8, “non terá o problema”, aseguran.

Presentado o primeiro manual práctico en español para Internet

Raquel Noya — 2012-09-20T12:11:45Z

Internet fixo posible que cada vez sexan máis as persoas que deciden difundir as súas ideas e opinións a través da escritura por todo o mundo, converténdose así en axentes transmisores da lingua que, na maioría dos casos, acertan no fondo pero non na forma.
Quere dicir isto que, malia que moitos navegantes se esforzan por escribir con corrección, o certo é que non sempre o conseguen, e acaban facendo evidente o seu descoñecemento do idioma e mesmo da propia ferramenta que usan.
É por isto que blogueiros, tuiteiros, xornalistas dixitais e demais profesionais que utilizan a Rede no seu día a día, agardaban a presentación deste primeiro manual práctico en español de uso de Internet como auga de maio, e a Fundéu BBVA non se fixo agardar máis.
A sede da Real Academia Española foi o lugar escollido para presentar o libro Escribir en internet. Guía para los nuevos medios y las redes sociales, unha ferramenta fundamental e de grandísima utilidade tanto para profesionais como seareiros das plataformas virtuais, que permitirá, entre outras cousas, coidar a escritura e usar correctamente o idioma na Rede.
O acto de presentación, que se puido seguir en directo vía Internet, estivo presidido polo director da Real Academia Española e presidente da Fundación del Español Urgente (Fundéu BBVA), José Manuel Blecual, quen considera que o manual “é unha caixa de ferramentas axeitadas para o traballo diario dos profesionais”.
O manual achega unha serie de indicacións de uso xeral do medio e estudos de máis de corenta expertos sobre cortesía na Rede, correspondencia electrónica, reputación online, redacción para blogs, mensaxeiría instantánea, xestión de comentarios, redes sociais, emoticonos, accesibilidade... sen esquecer a propia lingua, con recomendacións sobre o uso do español global, uso de abreviaturas... a fin de contas, todo o que resulta necesario para expresarse con corrección e fluidez na Internet.
O coordinador do manual, o xornalista Mario Tascón, quen afirma que “non é só unha obra feita para xornalistas”, indica que para a súa elaboración foi necesaria a axuda de expertos de multitude de países, así como a recompilación de milleiros de traballos e escritos subidos á Rede, dos que se extraían conclusións válidas para tomar como referencia.
Tascón afirma que a necesidade xeral dun manual deste tipo xustifícase polo desexo da xente de coidar o que escriben de forma pública, un interese que vai medrando a medida que se estende o uso das novas tecnoloxías.
O xornalista cualifica este manual de “máis moderno que o empregado noutros libros de estilo que se puideron sacar no tempo”, xa que, segundo indica, “nel tamén interviñeron os lectores”.
Afortunadamente, este non se trata dun proxecto que se imprime en papel e queda estancado para acabar morrendo nun par de anos; trátase dun proxecto en continua renovación que se poderá cumprimentar en liña na web manualdeestilo.com.

A mostra interactiva sobre Valentín Paz-Andrade fai parada en Compostela

Raquel Noya — 2012-09-19T12:16:04Z

A Consellería de Cultura, Educación e Ordenación Universitaria vén de trasladar a súa exposición multimedia sobre Valentín Paz-Andrade a Santiago de Compostela, onde estará ata o vindeiro 31 de setembro.
A vida e obra do autor homenaxeado no pasado Día das Letras Galegas, daranse a coñecer na Biblioteca Pública Ánxel Casal de xeito moi distinto ao tradicional, a través duns paneis interactivos dende os que os visitantes acceden aos textos explicativos dunha maneira máis lúdica e amena.
O secretario xeral de Cultura, Anxo Lorenzo, e o secretario xeral de Política Lingüística, Valentín García, acompañados pola subdirectora da biblioteca nodal, Begoña Domínguez, foron as personalidades encargadas da súa inauguración o pasado 18 de setembro, nun acto para os medios no que aproveitaron para interactuar nos distintos paneis.
A mostra está formada por 5 paneis con textos explicativos sobre as diversas facetas do escritor e empresario; cada un deles inclúe candasúas pezas audiovisuais nas que diferentes coñecedores da traxectoria do escritor amosan a súa visión sobre Paz-Andrade.
Entre estas celebridades atópase o presidente do Consello da Cultura Galega, Ramón Villares; o presidente da Real Academia Galega, Xosé Luís Méndez Ferrín; o xornalista e escritor Tucho Calvo e o filólogo Gregorio Ferreiro.
Logo do seu paso por Compostela, a mostra continuará a súa viaxe polas bibliotecas nodais de Lugo e da Coruña, que lle darán acubillo en outubro; e por Espazo Xoven de Ourense, onde estará en novembro.
A itinerancia da exposición rematará no Museo do Mar de Galicia, en Vigo, a onde chegará no mes de decembro.

Un estudo vincula o envío de SMS eróticos con relacións de risco entre adolescentes

Raquel Noya — 2012-09-19T11:42:20Z

Se Olvido Hormigos, a concelleira do PSOE da localidade toledana de Los Yébenes que estivo preta a dimitir logo de que se difundira publicamente un vídeo erótico seu, coñecera os riscos do sexting antes de telo enviado, probablemente non se tería metido na enleada que se meteu e evitaría que hoxe estivésemos citándoa nesta nova.
A fin de contas, Hormigos é maior de idade e o que faga na súa intimidade é cousa súa, porén a cousa tórnase moito máis preocupante se a práctica se estende (como de feito está a suceder) entre os e as adolescentes de todo o mundo.
Segundo un estudo encargado polos Centros para o Control e a Prevención de Enfermidades de Estados unidos (CDC), un de cada sete estudantes de secundaria de Los Ángeles ten enviado unha mensaxe ou foto con contido sexualmente explícito a través do seu móbil, unha práctica que, segundo o informe, “incrementa as probabilidades de ter problemas relacionados”.
A investigación baséase nunha enquisa realizada en 2011 e publicada pola revista Pediatrics, e os seus resultados indican que os adolescentes de Los Ángeles que enviaran mensaxes subidas de ton “tiñan sete veces máis posibilidades de ser sexualmente activos que aqueles que dixeron que nunca enviaran mensaxes eróticas”, co conseguinte risco para a saúde se non se toman as medidas de prevención axeitadas.
O que verdadeiramente pretendían saber os investigadores era se existe un vínculo entre o sexting (envío de SMS con contido sexual) e asumir riscos co corpo, e segundo o director do estudo e investigador en redes sociais da Universidade de Southern California en Los Ángeles, Eric Rice, “a resposta é afirmativa”.
O estudo arrebola que algo máis do 40% dos adolescentes con smartphone afirmou manter relacións sexuais, pero só dous terzos admiten usar preservativos.
En resumo, e segundo as conclusións dos investigadores, “o envío de mensaxes de contido erótico semella ser un reflexo ou un indicio dun comportamento sexual real, e o que fan nas súa vidas ao estar desconectados é o que fan nas súas vidas cando están conectados”, espetaron.
Asemade, existe a preocupación de que esas fotos rematen en Internet e de que se acose aos adolescentes, ou de que os estudantes que reciben mensaxes de texto sexualmente explícitos puideran ser acusados de pornografía infantil.