A AELG entrega este sábado os seus galardóns anuais, incluíndo a categoría de blogs literarios

O caderno Versos e aloumiños, un dos nomeados na categoría de blogs

Esta primavera vén chea de reivindicacións da nosa cultura e das nosas letras: o encontro ferrolán de Poesía Salvaxe, as múltiples feiras do libro que se están a celebrar (coa de Santiago estes días en activo), o Día das Letras Galegas do 17 de maio ou, tamén, a festa da nosa literatura que se celebra este sábado 4 de maio no Centro Ágora da Coruña. Este último acontecemento, igual cós devanditos, tamén nos colle de preto en Código Cero, por mor das súas vertentes tecnolóxico-dixitais. A festa do 4 de maio vén da man da Asociación de Escritoras e Escritores en Lingua Galega, que entregan os galardóns da cuarta edición dos seus premios. Entre as categorías, como cada ano, inclúese a modalidade de blog literario. Nela, están nomeados Ramón Nicolás polo seu Caderno da crítica, Armando Requeixo por Criticalia e Antonio García Teijeiro e Antón García-Fernández por Versos e aloumiños.
Pero tamén hai ensaio, poesía, narrativa, tradución, teatro, literatura infanto-xuvenil e traxectoria xornalística. As obras gañadoras daranse a coñecer este sábado Gala das Letras, “un dos actos máis importantes na vida da asociación”, que comezará ás 20.00 do vindeiro sábado 4 de maio no Auditorio do Centro Ágora da Coruña.
Damos conta de seguido dos restantes finalistas:
· Ensaio
Como falar e escribir en galego con corrección e fluidez, de Carlos Callón (Xerais)
O labirinto da saudade, de Luís G. Soto (Laiovento)
Onde o mundo se chama Celso Emilio Ferreiro, de Ramón Nicolás (Xerais)
· Literatura Infanto-xuvenil
Eu, pel, de Teresa González Costa (Xerais)
O corazón de Xúpiter, de Ledicia Costas (Xerais)
O neno can, de Fina Casalderrey e Francisco Castro (Galaxia)
Palabras de auga, de Marcos Calveiro (Xerais)
· Xornalismo Cultural
Ana Romaní
Blanca-Ana Roig Rechou
Carme Vidal
Fran P. Lorenzo
Iago Martínez
María Solar
Moncho Paz
Ramón Nicolás
· Narrativa
A noite branca, de Francisco X. Fernández Naval (Xerais)
As voces baixas, de Manuel Rivas (Xerais)
Morgana en Esmelle, de Begoña Caamaño (Galaxia)
Tonas de laranxa, de María Lorenzo Miguéns e Manuel Lorenzo Baleirón (Xerais)
Verde oliva, de Xavier Alcalá (Galaxia)
· Poesía
Boca da cobra, de Francisco Salinas Portugal (Biblos)
Emily on the road, de Ramón Blanco (Acha Escrava Editora)
Fase de trema, de Lorena Souto (Espiral Maior)
O silencio, de Mario Regueira (Xerais)
Os ángulos da brasa, de Manuel Álvarez Torneiro (Factoría K de libros)
ruído de fondo, de Daniel Salgado (Xerais)
· Teatro
Banqueiros, de VV. AA. -Francisco Pillado, coordinador- (Laiovento)
Novo teatro fantástico, de Manuel Lourenzo (Laiovento)
· Tradución
Cancioneiro, seguido das Rimas dispersas, de Petrarca, en tradución de Darío Xohán Cabana (Edicións da Curuxa)
Carné de identidade, de Mahmud Darwix, en tradución de Moncho Iglesias e Samar Sabat (Barbantesa)
Gretchen, miña nena, de Christine Nöstlinger, en tradución Isabel Soto (Oxford University Press)
O home unidimensional, de H. Marcuse, en tradución de Jesús Saavedra (Universidade de Santiago)
O sentido dun final, de Julian Barnes, en tradución de Xesús Fraga (Rinoceronte).
Alén destas categorías, os Premios AELG constan doutros tres galardóns outorgados pola Asemblea de socios e socias da AELG:
· O premio Mestres e Mestras da Memoria, de nova creación, que se concede nesta primeira edición a Manuela Cortizo Medal e Ángel Rivas Veiga, “por toda unha vida de dedicación exemplar á transmisión oral de saberes e valores da nosa cultura popular tradicional”;
· O Premio Institucións que se concede a quen contribuíse á divulgación da lingua e cultura galega, e que este ano será para o asociacionismo cultural representado por aquelas asociacións que, nacidas nas décadas dos 60 e 70, aínda manteñen a súa vitalidade e activismo cultural (Agrupación Cultural O Galo, Agrupaçom Cultural O Facho, Clube Cultural Valle Inclán, Agrupación Cultural Auriense, Agrupación Cultural Francisco Lanza, Agrupación Cultural Avantar, Agrupación Cultural Alexandre Bóveda, Agrupación Cultural Lumieira, Sociedade Cultural Medulio, Associaçom Cultural Amig@s da Cultura de Pontevedra):
· E mais o Premio AELG 2013 Escritora Galega Universal, outorgado pola Asemblea á escritora Lídia Jorge, galardón “que a distingue como autora que combina a excelencia literaria co compromiso ético que o converte en referente na defensa da dignidade humana”.
No transcurso da gala a AELG tamén entregará aos humoristas gráficos Siro López Lorenzo “Siro”, Xosé Lois González Vázquez “O Carrabouxo, Xosé Ángel Rodríguez López “Gogue”, Xosé Carreiro Montero “Pepe Carreiro” e Xaquín Bieito Marín Formoso “Xaquín Marín” a distinción Bos e Xenerosos.