A Axenda 2014.gal recibe hoxe o Premio á Iniciativa da Administración concedido polo CPEIG

A Axenda 2014.gal, a iniciativa da secretaría xeral de Modernización e Innovación Tecnolóxica que nun prazo máximo de catro anos pretende levar ao noso país a competir coas primeiras potencias europeas en materia de novas tecnoloxías e Internet, é un proxecto que, polas súas aspiracions e pola súa envergadura merecía ser recoñecido mesmo antes de comprobar se se cumpliron os obxectivos marcados.
O Colexio Profesional de Enxeñaría en Informática de Galicia, adiantándose a outras entidades que seguramente tiñan en mente recoñecer o mérito que sen dúbida ten este proxecto, vaille entregar hoxe o Premio á Iniciativa da Administración que recollerá a secretaria xeral de Modernización e Innovación Tecnolóxica, Mar Pereira, no marco da II Noite da Enxeñaría en Informática de Galicia, que se celebra en Santiago de Compostela.
Con este galardón o devandito organismo profesional, que suma preto de 300 colexiados e colexiadas, recoñece a elaboración dunha estratexia tecnolóxica que formaba parte dos compromisos do actual goberno e que establece os pasos para converxer coa estratexia global europea nesta materia no horizonte do 2014, segundo informan dende a entidade pública, “sen perder de vista o actual marco de austeridade e contención do gasto”.
Lembremos que a Axenda 2014.gal contempla cinco obxectivos estratéxicos, os cinco que quizais levaron ao xurado dos Premios a concederlle o galardón, e que son os que seguen: a modernización da Administración para facela máis eficiente, eficaz e próxima á sociedade; a competencia dixital dos cidadáns como base para o emprego de calidade; o cambio profundo, a través do uso das TIC, do modelo produtivo; a transformación e articulación dos axentes do sector TIC para convertelo en sector estratéxico de futuro e tractor do resto de sectores chave para Galicia e o despregamento de infraestruturas de telecomunicación para a vertebración territorial.
Estes Premios, como viñemos informando ao longo de toda a semana, serán entregados esta mesma noite nun acto conmemorativo no Hostal dos Reis Católicos en Santiago de Compostela.
Ademais da Axenda 2014.gal, o CPEIG vai premiar ao Proxecto Fin de Carreira de Roberto Rey Expósito; a factura electrónica da Consellaría de Facenda; a traxectoria profesional do conselleiro delegado e fundador de Códice Software, Pablo Santos Luaces e ao Clúster TIC de Galicia.