A blogueira Carmen Castro, protagonista do novo Ciberfaladoiro Feminista da Deputación de Lugo
xoves, 3 de decembro do 2020
O
ciclo de Ciberfaladoiros Feministas que organizan a Deputación de
Lugo e o Foro Feminista Maruxa Mallo continúa este venres 4 de
decembro cunha charla online da economista e activista en
igualdade Carmen Castro, que abordará as estratexias feministas para
repensar a economía. Poderá seguirse a través da
canle de YouTube de Nomenklaturas Gestión Cultural, ás 19.30
horas, e está aberta á participación do público a través de
Whatsapp no número de teléfono: 690 117 254.
Carmen
Castro é especialista en políticas europeas de igualdade,
estratexia de mainstreaming de xénero e empoderamento das
mulleres na administración pública. Licenciada en Economía pola
USC, como investigadora foise especializando na consultaría e
asesoramento de políticas públicas de xénero. É autora de varias
publicacións e guías prácticas, e promotora de Sin
Género de Dudas, a primeira bitácora dixital feminista con
perspectiva de xénero de lingua hispana.
Programación
Ciberfaladoiros
O
ciclo de Ciberfaladoiros Feministas rematará o venres 11 de decembro
coa charla de Sonia Ramos. No marco deste ciclo de coloquios, a
periodista Mabel Lozano presentou por primeira vez en Galicia, a
semana pasada, o seu novo libro PornoXplotación de denuncia
da trata humana.
A
Deputación de Lugo, xunto co Foro Feminista Maruxa Mallo, impulsa
esta iniciativa co obxectivo de “conectar a loita polos dereitos
das mulleres coa veciñanza da provincia de Lugo, propoñendo
alternativas para erradicar situacións derivadas da estrutura social
patriarcal, empoderar ás mulleres e loitar contra as violencias
machistas”. A institución provincial colabora cunha achega de
máis de 13.000 euros e tamén coa difusión a través de redes
sociais e dos Servizos Audiovisuais provinciais destes coloquios.
