A tropa de trapo segue a colleitar éxitos nas salas de cine 3D
mércores, 10 de novembro do 2010
Despois do
bo resultado obtido nas taquillas ao longo da semana pasada, A tropa de trapo no país onde sempre brilla o
sol, a primeira película de animación en 3D estereoscópito feita en España,
continúa a súa andaina nas salas de cine, mantendo na súa segunda semana as 91
copias coas que se estreou o pasado 29 de outubro. Deste
xeito, aquí no noso país, mantén as 10 copias coas que estreou, cinco en 3D en galego e outras cinco en 35mm
en castelán.
A película, na que colabora a Televisión
de Galicia, xa recadou 110.000 euros na súa primeira fin de semana e dende
Continental e Abano Producións agardan poder repetir este bo resultado
en taquilla na vindeira fin de semana. Desta maneira, esta longametraxe de
animación dirixida por Alex Colls, podería chegar a ser, segundo afirman, “unha das películas galegas con maior
recadación, sobre todo tendo en conta que vai dirixida a un público meramente
infantil (de tres a sete anos) e prográmase só nas primeiras sesións dos cines”.
A historia, protagonizada por un grupo de
entrañables mascotas, está distribuída por Alta Classics e está baseada en The Happets, unha serie de 52 capítulos
de 7 minutos que xa fora emitida pola TVG.
Nela, Mumu, Milo, Rita, Talalo, Alfred e
Olga son A tropa de trapo, unha
orixinal pandilla de mascotas confecionadas con telas de diferentes estampados.
O grupo sente envexa da “pulcritude dun rabaño de ovellas” que,
en realidade, forman parte dun espectáculo ao que Mumu pretenderá unirse por
tódolos medios.
