INTECO premiado pola súa política de protección de datos
mércores, 16 de febreiro do 2011
O Instituto Nacional de Tecnoloxías da
Comunicación (INTECO) vén de ver recoñecido o seu labor a prol da mellora da
protección de datos persoais na Rede cunha mención especial da Axencia de
Protección de Datos da Comunidade de Madrid que celebrou recentemente os seus
Premios anuais.
O obxectivo destes galardóns é recoñecer
as experiencias ou proxectos máis sobresaíntes no ámbito europeo na protección
de datos persoais nas Administracións públicas e nesta VI edición, o primeiro premio recaeu no Concello
de Zaragoza polo seu proxecto de actuación en materia de protección de datos de
carácter persoal na web municipal.
O director xeral de INTECO, Víctor
Izquierdo, recolleu o recoñecemento ao labor do Instituto no desenvolvemento de
proxectos dirixidos a mellorar a protección de datos persoais, o pilar
fundamental da entidade, que inclúen principalmente actividades de información,
difusión, sensibilización e formación.
Con este servizo á cidadanía, pequenas
empresas e Administracións Públicas, INTECO dalle pulo ó coñecemento, ás
ferramentas e ás boas prácticas que permiten reforzar a protección dos datos
persoais, salvagardar os dereitos dos cidadáns e, en definitiva, segundo
afirman, “aumentar a confianza na
Sociedade da Información no noso país”.
