O Concello de Santiago achega axudas para coidar e dixitalizar o comercio local

O Concello de Santiago quere botar unha man ao comercio local, mesmo poñendo o foco nas súas principais demandas en dixitalización. Así o fixeron saber onte o rexedor Martiño Noriega e máis a concelleira Marta Lois, que debullaron as axudas previstas para 2018 ao abeiro de Coidar para mellorar, mellorar para coidar, convocatoria de subvencións que integra os incentivos previos dos departamentos de Comercio e de Lingua e que fai referencia no seu nome á necesidade de velar polo comercio para que sexa máis competitivo e innovador. Unha das liñas de recursos é unha liña específica TIC.
En termos máis concretos, as axudas buscan mellorar a eficiencia no uso dos recursos públicos, incrementando a contía ata os 40.000 euros. Ademais, pon en xogo unha simplificación dos trámites para solicitalas (“onde antes había varias, agora hai unha única convocatoria”, sinalaron Noriega e Lois) e unha mellora no seu achegamento á cidadanía. De feito, para a difusión da campaña crearase unha web, que estará activa a partir desta sexta feira (venres) e na que as e os comerciantes “poderán participar activamente”, engadiron.
A campaña terá tamén feitura visible, unha fasquía de planta que irá medrando a medida que a comunidade medre e se multipliquen as iniciativas postas en xogo. A planta tamén adquirirá volume, en primeira instancia, co incremento do número de visualizacións do vídeo de promoción da campaña nas redes sociais.
Noriega e Lois tamén lembraron de ao abeiro de Coidar para mellorar, mellorar para coidar incorpóranse tamén as axudas que “ano tras ano” leva impulsando o Consorcio de Santiago dentro do programa Localízate, destinadas á rehabilitación dos locais da cidade histórica. Grazas a esta marca global, aquelas solicitudes para a rehabilitación de locais situados no casco histórico serán canalizadas a través do Consorcio.
Como dixemos, os obxectivos da convocatoria presentada onte pasan pola implantacións das novas Tecnoloxías da Información e a Comunicación (TIC), a mellora das condicións físicas dos locais, a mellora a comunicación dos mesmos e incorporar ou ampliar o uso da lingua galega. Así, “haberá tres liñas de actuación que aglutinan as axudas que viñan sendo impulsadas por lingua e comercio”, explicou o alcalde.
Por unha banda, a Liña A, de axudas para investimentos na adecuación física dos locais. Por outra, a Liña B, de axudas para investimentos en TIC e outras innovacións e, por último, a Liña C, de axudas para gastos de comunicación realizada en lingua galega. Poderán resultar beneficiarios aqueles comercios que estean no termo municipal de Compostela e que realicen actividades incluídas no anexo 2 da convocatoria. “A contía total”, fixo saber Marta Lois, “é de 40.000 euros, aumentando en 5.000 o que dedicabamos o ano anterior coas dúas axudas”.
Así, destínanse 25.000 euros ás liñas A e B e 15.000 á liña C. Porén, a contía individualizada da subvención que se outorga será como máximo de 5.000 euros para as liñas A e B, e outros 5.000 para a liña C, de tal xeito que o máximo por persoa solicitante, no caso de concorrer ás tres liñas de subvención, será de 10.000 euros.
O prazo para presentar solicitudes remata o 22 de outubro e deberán entregarse no Rexistro Xeral do Concello (rúa do Presidente Salvador Allende, 4), ou ben a través do enderezo comercio@santiagodecompostela.gal.