Ordes prepara a I edición do Festival de Curtametraxes Libres Cinestable

O audiovisual galego está agora mesmo nun momento no que a innovación é a súa marca da casa máis característica, e no que todo canto se fai aporta un pequeno gran de area moi necesario para potenciar a competitividade deste sector no eido nacional e internacional.
Festivais de curtas, películas en 3D, grandes actores e actrices que triunfan por todo o mundo, creatividade nas pezas creadas, promoción internacional dos films… en definitiva, grandes doses de innovación que fan falta nun sector no que a crise se nota tanto ou máis que noutros sectores máis fortes.
A última pequena dose de enerxía e empurrón para este sector vén de facela a asociación Inestable, que en colaboración co Concello de Ordes, está a preparar a celebración dun festival de curtametraxes na vila coruñesa.
Cinestable, que así se fai chamar o evento, vaise celebrar o vindeiro día 5 de agosto no auditorio da Casa da Cultura de Ordes, e con el, a organización pretende “fomentar o uso de licenzas abertas, ao tempo que se axuda a dar a coñecer as creacións tanto da xente amateur como dos profesionais do sector audiovisual”.
A temática das curtometraxes será libre, coa única restricción de que se licencie baixo unha licenza Creative Commons.
A inscripción é de balde e deberá realizarse a través da web oficial da entidade. O prazo de entrega de traballos abriu o día 14 de xuño e poderánse entregar obras ata o vindeiro día 1 de agosto.
Cinestable contará coa proxección de diferentes curtametraxes Creative Commons recoñecidas a nivel mundial, e disporá de máis de 800 euros en premios a repartir entre as mellores curtametraxes presentadas.
Para obter máis información sobre este evento, no que tamén participan outras entidades como AC Proxecto Trasno, pódese acudir á web oficial ou solicitar información por correo electrónico á dirección cc@intestable.org.