Os impulsores de CreaAppcuentos queren chegar ás 100.000 descargas ao longo de 2014

Avelino Correa, creador da aplicación, fálanos dos seus obxectivos para 2014

CreaAppcuentos é unha aplicación galega de gran proxección (gañou recentemente o primeiro premio do concurso de startups vía web de Startup Pirates) e que consiste nun recurso para dispositivos con Android e iOS que permite a creación de contos ou historias dun xeito sinxelo e intuitivo. Pois ben, tanto polo dito recoñecemento como pola orixinalidade e a innovación postas en xogo, a iniciativa CreAppcuentos xerou estes días unha importante expectación na comunidade internauta (pais, nais, profesorado, nenas e nenos, etc). Co gallo disto, os responsables da ferramenta veñen de botar luz sobre as funcionalidades e o alcance da aplicación, que xa está no mercado e dispoñible para iOS. Segundo nos contan, a idea é acadar as 100.000 descargas e permitir que se lle poida tirar partido dende calquera parte do mundo.
En palabras de Avelino Correo, fundador de CreAppcuentos xunto con Maribel Martínez, a ferramenta ten o obxectivo firme de fomentar a imaxinación, a creatividade, a aprendizaxe e a interacción cos pais. Polo que respecta á resposta xerada polas nais e pais que xa tiveron ocasión de descargala, Correa apunta a que a aceptación está a ser moi boa. E engade: “Todas as valoracións son positivas e a xente que emprega a aplicación salienta a calidade das ilustracións e o baixo custo dos paquetes adicionais. Para nós foi unha boa noticia xa que significa que o estamos facendo ben e que os nenos poden desenvolver as súas habilidades usando nosa app”.
No que atinxe ao seguimento xerado, Correa apunta que “malia os poucos días que leva no mercado, a aplicación xa foi obxecto de centos de descargas e en breve chegará ás 1.000”. Para o equipo responsable deste desenvolvemento, o máis curioso deste punto é o lugar de orixe das peticións: Colombia, México, Brasil, USA, China, Tailandia, Turquía, Finlandia, etc. “Un dos nosos obxectivos”, explica Correa, “é que se descarguen en máis de 50 países, que se cren contos en múltiples idiomas e que gocen con eles na rede social”.
O desenvolvemento da ferramenta, explican, seguiu a metodoloxía do Lean Startup, unha forma de facer as cousas que lles permitiu “dunha maneira rápida” validar hipóteses e definir con precisión o produto despois de falar cos clientes. A fórmula empregada, polo tanto, foi a da aprendizaxe validada. Por certo que a idea colleu corpo na primeira edición do concurso Startup Pirates de Vigo, na que o proxecto galego acadou o primeiro premio para logo facerse co segundo premio no evento Lean Startup Machine en Madrid.
No que atinxe á pegada deixada xa no eido educativo, os responsables de CreAppcuentos foron quen de pechar varios acordos con centros de ensino para que poidan empregar a ferramenta. A idea, din, “é fomentar o maxín con historias incribles onde os nenos son os protagonistas; trátase en definitiva dunha ferramenta moi boa para fomentar as intelixencias múltiples dos nenos”. O equipo de CreAppcuentos mesmo chegou a recibir un comentario dunha educadora que está a utilizar a app con nenos con síndrome de Down “e a aplicación está a ter boa aceptación cos alumnos”.
No que se refire aos vindeiros pasos a dar, Avelino Correa cualifica o ano 2014 como un ano pleno de obxectivos. Entre eles, di, “buscamos acadar as 100.000 descargas, incorporar stickers animados e fondos en 3D aos contos e personaxes coñecidos de televisión e definir a rede social Cuentoteca na que os usuarios poderán subir contos e descargarllos doutros usuarios”. Segundo engade, esta comunidade será “un andel virtual con miles de contos que podamos ler con nosos peques e suporá ademais un aforro importante en diñeiro e en espazo”.
CreAppcuentos está a día de hoxe dispoñible na App Store de Apple. A mediados do mes de febreiro xa se poderá descargar para os dispositivos Android desde o Play Store. En ambos os casos, a ferramenta é de balde e inclúe un paquete completo para que se poidan crear contos.
A aplicación vén da man de Avelino Correa e Maribel Martínez (coa colaboración de ilustradores como Pepe Carreiro, Alberto García Ariza, Abraham Carreiro, Raquel López, Pirusca...).