Telefónica amplía a velocidade da súa rede de banda larga móbil na nosa terra

Telefónica vén de someter a unha serie de melloras a súa oferta de rede banda larga móbil na nosa terra. Segundo apunta a operadora, xa comezou a activar a súa rede de 900 Mhz, o que permitirá, sinala, “ampliar a cobertura de banda larga móbil, aumentar a velocidade de transmisión e mellorar o sinal no rural e no interior de edificios”. O emprego da devandita frecuencia, engade, “é consecuencia da reorganización e a liberalización de frecuencias iniciada en abril deste ano en España, e de xeito simultáneo a compañía aumentou ata 42 mgb, o dobre do existente, a velocidade dispoñible en cidades como Vigo, Santiago e A Coruña”.
Isto lévase a cabo logo de ter rematado a primeira fase do despregue da tecnoloxía dual cell, a xuízo da compañía a máis avanzada en telecomunicacións móbiles. Lembrar que a frecuencia 900 prendeuse a comezos de setembro en 220 estacións do noso país. As súas condicións, engade Telefónica, poñen en xogo “unhas condicións óptimas de espallamento e alcance para a telefonía móbil, de xeito que os usuarios de Movistar experimentarán dende este mes melloras notables en canto a cobertura, calidade e velocidade dos servizos”.