Televés formará a instaladores de fibra óptica de toda España
luns, 29 de novembro do 2010
No marco do convenio de
colaboración que Televés mantén coa Federación de Instaladores de
Telecomunicacións (Fenitel), a compañía galega vén de anunciar que lle vai
ofrecer a todas as asociacións territoriais membros da Federación, a
realización de relatorios e obradoiros dirixidos a formar ao persoal das
empresas nas novidades técnicas asociadas ao regulamento que ordea a actividade
de instalación e o mantemento de equipos e sistemas de telecomunicación,
segundo recolle o Real Decreto 244/2010, do 5 de marzo.
O amplo programa formativo
arrincará cunha primeira batería de relatorios, que se desenvolverán por todo o
Estado, centrados en fibra óptica, en istalación FTTH e Redes de datos, nun
programa que recolle leccións prácticas co medidor da compañía H45 e con redes
de extensión coaxial con F.O.
Nunha segunda fase, Televés
desenvolverá accións formativas centradas noutras materias, co obxectivo,
segundo apunta, “de cubrir por completo
as necesidades dos profesionais de cara á súa adaptación á nova normativa”.
A colaboración de Televés con
Fenitel forma parte do compromiso da compañía galega de dar “o máximo respaldo aos profesionais da
instalación nun momento como o actual, no que teñen que enfrentarse a novos
conceptos e tecnoloxías”.
Nesta liña, Televés xa desenvolveu
en Madrid, os días 28 e 29 de outubro, unhas xornadas formativas dedicadas a
presentar as principais novidades técnicas e de produto asociadas ao novo marco
regulatorio do sector.
